ក្រោយមានការ ជជែកសម្រប សម្រួលគ្នា រវាងអាជ្ញាធរ ខេត្តកែប ជាមួយភាគី រៀតណាម ប្រជានេសាទខ្មែរចំនួន ២៥នាក់ បានត្រឡប់ មកដល់ទឹកដី របស់ខ្លួនវិញ ដោយសុវត្ថិភាព ក្រោយពីភាគីវៀតណាម បានចាប់ឃាត់ខ្លួនពួកគាត់ ដោយសារចូល ទៅនេសាទដោយខុសច្បាប់ក្នុងព្រំដែនទឹក របស់ប្រទេសវៀតណាម ក្នុងចំណុច កោះថាស កោះត្រល់ (ភូកុក)។
ទូករបស់ប្រជានេសាទ ចំនួន ០៥គ្រឿង ផ្ទុកមនុស្សចំនួន ២៥នាក់ បានត្រឡប់ មកដល់ទឹកដីរបស់ខ្លួនវិញ នៅព្រឹកថ្ងៃទី២៩ ខែតុលា ឆ្នាំ២០២០នេះ ដោយភាគីវៀតណាម សម្រេច ដោះលែងមកវិញ កាលពីយប់ ថ្ងៃទី២៨ ខែតុលា ឆ្នាំ២០២០ ក្រោយពីមានការ អន្តរាគមន៍ពីសំណាក់ នាយកដ្ឋានការពារព្រំដែន ទឹកកម្ពុជា ជាមួយភាគី អាជ្ញាធរវៀតណាមនៅ ចំណុចកោះត្រល់។
លោក សោម ពិសិដ្ឋ បានអញ្ជើញទៅសួរសុខទុក្ខប្រជានេសាទទាំង ២៥នាក់នោះ ហើយក៏បានណែនាំបន្ថែមឱ្យពួកគាត់យល់ អំពីការកំណត់ព្រំដែន ហើយឈប់ចូល ទៅនេសាទ នៅទឹកដីគេតទៅទៀត រួចក៏ អនុញ្ញាតិ ឱ្យវិលត្រឡប់ ទៅលំនៅឋានវិញ។
លោក សំរិទ្ធ ថាវរ៉ាត់ មេបញ្ជាការវរៈសេនាតូច នគរបាលការពារ ព្រំដែនទឹកលេខ ៤៣០ បានរៀបរាប់បន្ថែមថា លោកបានទទួលព័ត៌មាន ពីបងប្អូនប្រជានេសាទ ហើយក៏បានទំនាក់ទំនងទៅប្រធាននាយក ដ្ឋានការពារព្រំដែនទឹក ហើយខាង នាយកដ្ឋានក៏បាន ដាក់បទបញ្ជា ឱ្យវីរៈការពារព្រំដែន ទឹកខេត្តកែបយើង ទំនាក់ទំនងទៅ អាជ្ញាធរវៀតណាម ដើម្បី សុំការសម្របសម្រួល និងយកបងប្អូនប្រជានេសាទ ត្រឡប់មកវិញ។
លោកបានបន្តទៀតថា ប្រជានេសាទចំនួន ២៥នាក់ បានវិលត្រឡប់ មកវិញ ដោយមានការសម្របសម្រួលពីសំណាក់ អាជ្ញាធរខេត្តកែប ហើយប្រជានេសាទ យើងក៏មាន ការត្រេកអរណាំស់ដែរ ចំពោះការយក ចិត្តទុកដាក់របស់ថ្នាក់ដឹកនាំខេត្ត ក៏ដូចជាអាជ្ញាធរពាក់ព័ន្ធ៕